ბათუმის აეროპორტიდან უკრაინის საერთაშორისო ავიახაზებმა დაიწყო ფრენა

ბათუმის აეროპორტიდან უკრაინის საერთაშორისო ავიახაზებმა დაიწყო ფრენა

26 მაისს, 22:50 საათზე ბათუმის აეროპორტმა უკრაინის საერთაშორისო ავიახაზების პირველ რეისს უმასპინძლა. თავდაპირველად, რეგულარული ფრენები კიევი-ბათუმის მიმართულებით, კვირაში 4-ჯერ, ხოლო ივლისი-აგვისტოს პერიოდში, კვირაში 7-ჯერ შესრულდება. პრომო აქციის ფარგლებში, 31 მაისამდე შეძენილი ბილეთის ფასი 37 ევროდან დაიწყება. B 737-500 ტიპის ავიახომალდი მგზავრებს კიევიდან ბათუმში საღამოს 22:50 ჩამოიყვანს, დილის 06:45-ზე კი უკან გაფრინდება. ფრენის ხანგრძლივობა 2 საათი და 20 წუთია. უკრაინის საერთაშორისო ავიახაზები, ქვეყნის ნაციონალური ავიგადამზიდია, რომელიც საერთაშორისო და ადგილობრივი მიმართულებით ასრულებს რეგულარულ რეისებს. ბორისპოლის საერთაშორისო აეროპორტიდან, ავიაკომპანია ევროპის წამყვანი ქალაქების, დსთ-ს ქვეყნების, ახლო აღმოსავლეთისა და აზიის მიმართულებით დაფრინავს. უკრაინის საერთაშორისო ავიახაზების ავიპარკი, 31 თანამედროვე თვითმფრინავისაგან შედგება. ზაფხულის სეზონის განმავლობაში, ბათუმის საერთაშორისო აეროპორტში რეგულარული და ჩარტერული რეისების მატება არის მოსალოდნელი.